Македонскиот Dota 2 играч Игор „Stojkov“ Стојков ќе настапи на Esports World Cup 2026, откако неговиот тим Inner Circle x Insanity обезбеди пласман преку источноевропските квалификации.
Inner Circle x Insanity стана последниот тим кој избори место на Esports World Cup преку затворените квалификации за Источна Европа. Во финалето, тимот славеше против MODUS со резултат 2-1, во серија која донесе голема борба и неколку клучни моменти.
Посебно се истакна првиот меч, каде што Inner Circle успеа да победи по повеќе од еден час игра. Еден од најважните играчи во тој меч беше токму Stojkov, кој со Snapfire заврши со импресивна статистика од 24 убиства.
На вториот меч, ниту еден од двата тима немаше сериозна предност во раната фаза, но MODUS успеа да ја преземе контролата по тимска борба околу 35. минута и да ја израмни серијата. Сепак, Inner Circle x Insanity одговори во решавачкиот меч, каде што тимот постепено изгради предност и ја затвори серијата за пласман на големата сцена.
Состав на Inner Circle x Insanity:
- Алтангињ „423“ Билгуун
- Игор „Stojkov“ Стојков
- Владислав „laise“ Лаис
- Владислав „Fernans“ Кочетков
- Тугстур „Se“ Дашевге
- Иван „ArtStyle“ Антонов — тренер
Покрај Inner Circle x Insanity, преку источноевропските квалификации пласман на Esports World Cup 2026 обезбедија и L1GA TEAM, Poor Rangers и Two Move.
Dota 2 турнирот на Esports World Cup 2026 ќе започне на 6 јули во Париз, Франција, со вкупен награден фонд од 2.000.000 долари.
За македонската Dota 2 сцена, ова е уште еден значаен момент, бидејќи Stojkov продолжува да се натпреварува на највисоко интернационално ниво и ќе има можност да се докаже против дел од најсилните тимови во светот.
