Тимот Falcons уште пред една година најави големо враќање на сцената, но тогашниот состав не ги оправда очекувањата. Беа потребни промени, па како последна шанса беше ангажирањето на еден од најдобрите играчи во историјата – Александар Костлијев. Популарниот s1mple не успеа да ја спаси годината за Falcons, па така тимот не успеа да се квалификува во главната фаза на Shanghai Major.
По овој разочарувачки настап на уште еден голем турнир, тимот на Falcons најави значителни промени, кои повлекоа бројни шпекулации за тоа кој ќе биде дел од новиот состав на тимот. Се споменуваа многу имиња, но никој не знаеше точно кој може да биде дел од оваа екипа.
Како прва голема ѕвезда, тимот го ангажираше Никола „Niko“ Ковач, еден од најдобрите фрагери во играта, кој со себе носи богатo искуство и знаење. По овој трансфер, сите сметаа дека тоа е само почеток, и дека Falcons ќе продолжи да привлекува искусни играчи, но сепак тоа не беше случај. Поранешната тројка на Team Heroic беше откупена од Саудијците, па така во тимот пристигнаа Tesses, Degster и нашиот, Дамјан „Kyxsan“ Стоилковски. Во тимот од минатата сезона остана само Magisk, кој веќе долго време е присутен на сцената.
Првите два турнири во годината – IEM Katowice и Blast Bounty Spring 2025 – не беа многу успешни за новоформираниот состав на Falcons, но тие беа период на адаптација. Знаците за потенцијал и напредок беа јасно видливи на последниот турнир, кој се одржа во Клуж, Романија, каде Falcons успеа да стигне до финалето, натпреварувајќи се против најдобрите тимови во светот. Брилијантните стратешки одлуки и лидерството на тимот од страна на нашиот Kyxsan беа клучни за успехот на оваа нова екипа која се уште е во фаза на адаптација. За жал, Mouz Esports беа поуспешни и тимот на Дамјан беше совладан со резултат од 3-1.
Се разбира, ова претставува добар показател и најава за можностите на Falcons во новата сезона, која е веќе започната. Се надеваме дека периодот на адаптација ќе се искористи на најдобар начин за да се подготви екипата за големи успеси.
